في انتظار البلتان

انحب انعرّس...انحب نبني دار...انحب كرهبة...انحب كسوة ...انحب صياغة...انحب قطعة ارض...انحب انعدّي مدّة باهية على البحر في بقعة باهية هاهو الصيف دخل والسخانة ماشية واتزيد...انحب انشيخ...انحب نتفرهد...انحب أورديناتور يعمل الكيف ...انحب نعمل حواسة البرّه.....انحب...انحب...انحب...وانحب...

منين يا حسرة...

سي الصادق، شخصية ظريفة وصاحب نكته، كنت احكيت عليه برشة مرّات في تدوينات سابقة، مرّة من المرّات تساءل: علاش واحد الفوق وواحد لوطة، علاش واحد يلعب بالفلوس لعب وواحد فقري...فقالوا له هذيكة حكمة ربّي وكان سواها( أي الناس الكل سواسية) راه طواها (أي طوى الارض وما عليها)، فاجابهم علاش الحمل الكل جاي علينا نحن الفقراء؟...ههههها ...واذا كان تتفرهد امورنا والناس الكل تولي كيف كيف...وماعادش نحكو على اغنياء وفقراء باش يطويها...يا ملا حال واحوال...

فقالوا له : باش يمتحنك ربّي...الحياة امتحان يا سي الصادق...

فاجابهم: الى حد الان ما بعثليش حتى بلتان bulletin...هههههها...

والله اتذكرت الطرفة هاذي وقت قريت مقال في جريدة الصباح هنا يحكي على شهريات رجال الأعمال وكيفاش الب د ج امتاع بولينا يتقاضى 45 الف دينار شهريا وفلان ياخذ ما نعرفش قدّاش...

بالله قارنوا واحد يتقاضى حوالي 45 الف دينار في الشهر وواحد يحكي على ان جيبه لم تدخله 5 دنانير منذ مدّة...

عندي واحد صاحبي يحب الادب والثقافة، ويحب الخمرة حبّا جمّا...فقير الحال وعندما تسأله عن أحواله يقول لك "ما عنديش أموال"...مرّة خذي قرض من البانكة وقصد بيه تونس العاصمة واتفرهد كيف حب وشاء وعاش مدّة متبرجز...وقال نهار سردوك ولا عشرة دجاجة...ثمّ عاد الى فقره فرحا مسرورا...هههههها .

احنا ميــــــــن وهـم ميــــــــــن

احنا قرنفل على ياسميـــــــــن

في انتظار البلتان ...تمنياتي لكم بالنجاح يا فقراء...