في ليلة افتتاح مهرجان الموسيقى: هاتو 20 دينار انحطكم في بقعة باهية... !!!

كنت انا والمدام في تونس العاصمة المدة اللي فاتت. نهار افتتاح مهرجان الموسيقى التونسية في الدورة 12 يوم 26 مارس 2008، أتعدّينا بالصدفة قدّام المسرح البلدي وفكرّنا باش ندخلو لعرض الافتتاح وكان ذلك من باب المزاح والفذلكة.

وكنا نعرف الدخول في المناسبات كيما هكة بالاستدعاء لكن حبّينا نتأكد ومشينا سألنا. فكان الجواب كيما توقعنا"الدخول بالاستدعاء". بقينا اشوية قدّام شبابيك المسرح البلدي وقلت للمدام مازحا احنا جينا من بعيد حقهم ايدخلونا.

اسمعني واحد من جماعة "الثقافة" وقالنا اتحبّوا تدخلوا قلنا له كان تعمل امزية. ومن خبيش عليكم فرحنا انا والمدام . وحبينا نعرفو الاجواء امتاع المناسبات هذي لا اكثر ولا اقل، لكن الفرحة ما دامتش !!! وفعل الخير تحول الى سمسرة.

قال هاتو 20 دينار وانحطكم في بقعة باهية بحذا المسؤولين... قلت لا كيفاش 20 دينار. قال هاتو 15 دينار، قلت لا. انا بيني وبينكم حتى دينار موش باش ندفعه اولا على خاطر منحبش الرشوة والمرتشين. وثانيا على خاطر المهرجان هذا ما يعني حتى شيء في اهتمامتنا الثقافية.

ضحكنا أنا والمدام على الفازا اللي وقعتلنا وعلى حال الثقافة في بلادنا !!!!!!!

ورجعنا فرحين مسرورين !!!!!! ههها هههها.