حوار الفياقة والمغلوب على امره:
- الفيّاقة: فيق النهار مشى عليك ياسخطة موش قلت عندك موعد لحداش (س11).
-المغلوب: مازال بكري، خلّيني نشبع من النّوم راهي الساعة امتاع الاقتصاد في الطاقة رجعت، الوقت اتبدّل اليوم خليني نرقد تعمل امزّية، خليني نرتاح.
- الفيّاقة: الرّاحة في القبر، محسوب انتم خلّتوني نرتاح، مرّة اتزيدو ساعة، مرّة اتنقصو ساعة...راني فدّيت روحي طلعت وتعبت من الخزعبلات امتاعكم...وحتّى السردوك كيف كثرتو عليه مسكين ماعادش عارف وقتاش ايصيح...حب يحرق هو والبهيم والكلب شوف هنا.
- المغلوب: انا ما عندي حتّى ذنب في الحكاية...انا محكوم...انا مغلوب وما عندي حتّى دخل في الحكاية كيفي كيفك.
- الفيّاقة: وعلاش حسب رأيك هاتفرعيس والتبديل والتغيير في الوقت؟.
- المغلوب: قالو للاقتصاد في الطاقة...
- الفيّاقة:آش معناها الاقتصاد في الطاقة؟ كيفاش التفرعيس والعذاب والتعب امتاعي ينفعكم في الاقتصاد في الطاقة؟
- المغلوب: ما نعرفش! صدّقني ما نعرفش!!!!
- الفيّاقة: كيفاش ما تعرفش!!!!؟ آشكون يعرف، انحب نعرف، انحب نفهم، انحب نقتنع...انحب...ماعادش يساعدني باش تتحكمو فيّ كيما تحبّو...ماعادش يساعدني باش اتبدلو التوقيت من غير ما تشاوروني.. . واتفسرولي وتقنعوني بجدوى هالتغييرات والتبديلات والجوجمة...المرّة الجاية ماعادش باش نقبل تبديل الساعة الاّ ماتبعثولي كشف الاعداد امتاعي bulletin de notes انا ملّي انطلق برنامج الساعة امتاعكم ما جاني حتّى كشف أعداد. احب نعرف آشنية مواد الطاقة اللّي نجحت فيها بامتياز وآشنية المواد اللّي طحت ودوبلت فيها. وكان جاني كشف الأعداد ونجحت بمعدل 19.75 من 20 وتقدير جيّد جدّا، نوعدكم المرّة الجاية نقبل باش اتبدلو التوقيت ساعتين وإلا حتّى ثلاثة خلاص موش ساعة بركة...
- المغلوب: باهي...باهي...خلّيني نرقد يرحم والديك
- الفيّاقة: ارقد أندادك شوف هنا...ومن اليوم ماعادش اتعمل عليّ باش انفيقك حتّى انشوف النتيجة امتاع الامتحان...
ههههههها.
ليست هناك تعليقات:
إرسال تعليق