ايبارك فيكم وعيشكم ويجعل منكم باش اتعاونونا في انجاز ها البحث الخاص بامنباتكم وطلباتكم لو فتح امامكم باب العرش المدّة الجاية وتحديدا ليلة 27...لو فتح امامكم باب العرش ...يا معشر المدونين...ماذا ستطلبون؟
اشنية امنياتكم وطلباتكم واحلامكم...وبربي عيشكم اتجاوبو بكل صدق وشفافية ونعرفوا مدى تقديركم للبحث العلمي والحقيقة العلمية خاصة عندما يتعلّق الأمر بيكم انتم تحديد يا اصحاب العقول النيّرة.
تكثر الأحاديث في المدّة هاذي في العادة على باب العرش... وثمّة برشة حكايات على الرهبان واللي من صغري وانا انحوم عليه بالريغ الناشف بدون فائدة...ههههها
.يا سيدي قالك اللي عندو الزهر يقبض على رهبان ويخنقو خنقة ما ثمّاش ويقول له كلمة واحدة:"إرزق ولا أتموت" ومعناه الاستجابة لأمنيات وطلبات هذا الشخص القابض على رقبته...وفي هذه الحالة الطلبات ستكون من الوزن الثقيل: الأموال الطائلة ، الأكداس من الذهب...
وقالك يا سيدي ثمّة مرة راجل خنق واحد، في الفجر، ماشي في بالو رهبان وبدا يخنق فيه "ارزق ولا اتموت"، والاخر مسكين ايجاوب فيه "منيش رهبان". والنافع ربّي الرّاجل باش ايموت وهو شاد اصحيح "ارزق ولا اتموت...ارزق ولا اتموت". وفي الاخير قال له: "كانك ماكش رهبان إرمش عيونك "...ههههها. وبدا الراجل مسكين يرمش في عيونه الصباح والرباح...قالك يا سيدي الرهبان ما يرمشش عيونه...وبعد ما قريب يقضي عليه اقتنع كونه الرّاجل موش رهبان.
وثمّة حكاية اخرى يا سيدي قالك واحد شاف بهيم (حمار) شك فيه رهبان...قبض على التستكيل testicules امتاعو...ههههههههها... وبدا ايقول" ارزق ولا اتموت.""ارزق ولا اتموت"...وابقى على الحالة هذيكة حتى مات البهيم مسكين...
ونعرف كونو عندكم برشة طلبات وامنيات واحلام و..و..و...اذكروا اهمها فقط (3 على اقصى تقدير).
اذا كان صادف وشدّيتو رهبان...هههههها...اشنية طلباتكم؟
هناك 4 تعليقات:
دوز تصبح ولاية
ههه
انشاء لله تقبض على الرهبان اللي احققلك ها الامنية ياchanfara.
واليوم عرفت اللي المدونين شايخين في بحبوحة كبيرة وكل طلباتهم وامنياتهم واحلامهم اتحققت...الحمد لله وحده:الأموال والخيرات،والديمقراطية وحرّية التعبير،والجنّة على وجه الأرض... وموت عمّار هههههها....
في الحقيقة اليوم اتهنيت عليكم يا معشر المدونين...وانشاء لله من حسن الى أحسن.
وأنا باش نبعث اميل الى الرهابين الكل باش يعرفو وين يمشو للناس اللي هم في حاجة ليهم في مناطق الظل والمناطق ذات الأولوية...ههههههها.
انا نتمنى نولي ملياردير خليجي والا رئيس كي يخرجلي الرهبان متاعك نقوله تفضل اش تحب ؟؟هههههههههه
ماهو واحد خليجي شد رهبان في الخليج وقاله نحبك تطرد المصارى الكل من عندنا جاوبه الرهبان قاله لاه اش عملنالك ههههه
خايف يا abunadem كان ايجي نهار وتبدا رهبان كبير وتقلب عليّ الفيسته لا ناس ولا نعرفوها....ههههههها
إرسال تعليق