هاهو قالك يا سيدي، الدول الكبيرة تعمل في أبحاث ومخصصة اموال طائلة باش اتشوف حل لازمة البترول، واتحب اتنقص اعتمادها عليه، وتلق بديل . اشنوة الحل زعمة؟ اش قاعدة تعمل من تحت حس مس؟
زعمة صحيح ها الاخبار اللي قاعدين نسمع فيها؟ لا، الجماعة يظهرلي ايفدلكوا واللعب موش بعشانا وماكلتنا.
والله الخبر صحيح: الاستراتيجية اللي ماشين فيها الجماعة هي تحويل القمح، "الطحين"، وهو كلمة خايبة في القاموس امتاعنا، الى طاقة حيوية بديلة عن النفط. قالك الجماعة ايحبوا على طاقة نظيفة تكون بديلة عن النفط، زعمة ما لقوا حتى حاجة اتجبلهم طاقة نظيفة كان القمح؟، وزادة ايحبو يلقوا حل لمشكلة فائض القمح والرّخص امتعاعو...وبنوك النهب تضغط على الدول باش اتهز ايديها على دعم الخبز والمواد الاساسية... فهمتوش حاجة...
بيني وبينكم اظهرلي الجماعة ناويين على الخراب الشامل، وباش اتصير كارثة كبيرة وشعوب الارض وقتها باش تستشهد الكل من اجل الخبز ولقمة العيش. اتخيلوا كيفاش باش اتكون الوضعية في المستقبل...العالم توه ايعيش أزمة كبيرة والعولمة فقرّت الشعوب...قالك هذاك ما ايكفيش يلزم انوروهم انجوم في القايلة...يلزم شراء خبيزة يصبح حلم صعيب التحقيق...يلزم الشعوب اتجوع باش نلق بديل لاستهلاك البنزين...احنا بدينا خايفين ياسر من استعمال دول الخليج سلاح النفط باش تضغط علينا نعملوا حاجة لفلسطين خاصة وان سعر البترول طلع طلعة اتخوف....هههها...
يلزم حل جذري لمشكلة اعتمادنا على نفط الخليج وارتفاع الأسعار...يلزم نلقو حل نظيف...يلزم نلقو مشكلة لفائض القمح ورخص صومة...وثمة تقديرات اتقول ان انتاج 250 فدان من القمح يمكن ان يتحول الى وقود باش ايمشي سيارة مليون ميل. وقالك زاده يا سيدي ان الدراسات بينت ان المزارع في بريطانيا يمكن توفر المواد اللازمة باش اتولد الوقود الحيوي في حدود خمس في المائة من اجمالي كميات الوقود التي تستهلكهم السيارات في بريطانيا كل عام. وهذاك هو الهدف اللي اتحب تحققو الحكومة البريطانية في سنة 2010.
وقالوا ان تحقيق هالهدف ما يحتاج كان لثلاث ملايين طن من القمح كل عام وهو الكمية الفايضة عن الاحتياجات المحلية !
كل الحاجات اللي عملوها من استعمار، حروب، نهب، استغلال خيرات الشعوب...منذ القرض الماضي مانفعتش..حتى رجعو للاستعمار المباشر مع العراق منفعش....الحل السحري باش مايبقوش كل مرة ايجربو في الحلول...هو قطع الخبز نهائيا على البطون الجائعة...هو الجوع..السلاح القادم لن يكون سلاحا كيمياويا ولا قنابل نووية...سيكون الجوع...الجوع...ثم الجوع.....
وباش ايزيدو يستعملوا زاده سلاح العطش...مشكلة النقص في المياه قاعدة تتعقد...وبعد ما ينجحو في تحويل القمح إلى طاقة بديلة...ايقصوا على الشعوب. الماء...ملّ عملة ها الشعوب قدّاش اتقاصي... في اخر الزمان المصارن امتاع البشر باش اتولي طرق سيارة لكراهبهم...
..الجوع والعطش السلاح الجديد الناجع والفعال للقرن الجديد... .القتل الرّحيم...وباش يعملوا مقبرة جماعية كبيرة ما صرتش ترفع الشعوب الكل الزائدة عن النصاب !!!
وكل عام وشعوب العالم بخير !!!
انا مش كافر بس الجوع كافر
أنا موش كافر بس العطش كافر
أنا موش كافر بس الجوع والعطش كافرين
ليست هناك تعليقات:
إرسال تعليق